MAL DEL FILU

Cuando se veía un neñu nun espoyetaba, mirabase a ver si tenía el mal del filu. La preba facíala una muyer que sabía d’eses coses, entamaba por poner al rapaz tirau en suelu colos brazos abiertos, garraba un filu y midía dende el pozu de la cabeza hasta la dea gorda del pie, dempués midía de punta a punta de los deos de les manes, colos brazos bien estiraos en cruz. Si les midies nun yeren iguales quería decir que el neñu tenía raquitismu o taba agüeyáu.
La cura conseguíase faciendo un montón de nudos nel filu, y poniendo-ylu al neñu nel pescuezu unos díes, de normal tres o cuatro; pasáu esi tiempu cortábase en cachinos y tirabase al fuéu mientres se decía un esconxuru
Anque los nuestros contertulios nun sabien cual yera el esconxuru, “pues solo lu conocía la muyer que lu facía”, si que podemos atalantar que nun taría muy alloñáu d’esti:

ESCONTRA LES FIGUERES

Pa curar les figueres que yos salen a les vaques nos tetos, nun hai remediu como el de les nueve piedriquines. Pa facelo entamase con nueve piedres y acábase con una, y pa que de resulatau tien de facese por nueve dies. Ha repetise siempre la mesma operación: dexar caer pol llombu la vaca les piedres d’una en una y según cai ca una va repitiéndose el esconxuru:

Figuera en carne
Figuera en sangre
Figuera en cuero figuera en suelo

El primer dia faise coles nueve piedres, recoyendose una menos del suelu, el segundu dia usense les ocho que queden del día anterior, y vuelve a recoyese una menos que’l día anterior y asina hasta el últimu día (el novenu) que solo se fai con una, que nun se recueye.

Esti remediu usase taimen pa coles persones, con resultaos siempre bonos. Dalgún, que nun creía nello, quedó ablucau cuando un día al llevantase de la cama nun tenía non verruga dalguna nel brazu y per munchu que buscó nun atopó nin cicatrices nos brazos nin restos de les figueres pente les sabanes de la cama.

Anque usao polos vaqueiros, esti esconxuru nun paez que seya privativu d’ellos, polo menos nos últimos tiempos, pues ye una zuna usada polos tratantes, bonos conoceores de los sos resultaos.

ESCONTRA LA PICADURA DE LA CULIEBRA

Cuando una culiebra picaba nel morru a una ovea mientres pacía, faciase-y un corte en forma de cruz y con una vara d’ablanu verde abierta al mediu y una xarra d’agua chiscabase-y la ferida y resfregabase-y l’ablanu. Al día siguiente nun había rastru de la picadura.

Pero nun siempre les coses yeren tan fáciles, cuando la picadura yera nel caldar d’una vaca o en cualquier otru sitiu delicáu, onde nun se puedieren facer cortes, recurriase a otru remediu; preparabense entos tres montoninos, un con nueve bolines d’estoupa, otru con nueve carbones y el últimu con nueve payes.

Coyíase una bola d’estoupa, un carbón y una paya y pasabase per onde taba la picadura, al tiempu dicíase el siguiente esconxuru:

La serpentina bendita
La serpentina maldita
Fueron a una apuesta
La que primero se vestía
La que primero se calzaba
Y la que primero su cornecina tocaba
La sepentina bendita fue
La que primero se vestía
La que primero se calzaba
La que primero su cornecina tocaba
Y la serpentina maldita
Diba por troncos y barroncos
Séquele la boca, como se seca esta estoupa
Séquele la babaya, como se secó esta paya
Séquele el corazón, como se secó este carbón

Apartabase la bola d’estoupa, el carbón y la paya, y agárrabase otru de los componentes de ca un de los montones y repitiase el esconxuru. Faciase la mesma operación hasta que nun queda nada en ningún montón. Esto faise solo un día, y al siguiente el tetu o lo que tuviera mordío ya ta curao.

En della bibliografía atopamos conxuros mui similares, nos que pue cambiar dalgún matiz na apuesta (6), pero nos que siempre cambien la serpentina por una cervatina (7) (8)

(1)(7) Curanderos y Santos Sanadores. Joaquín Fernández. Ed G.E.A. 1995
(2)(3)(5) Costumbres de nacimiento, matrimonio y muerte en Asturias. Museo del Pueblu d’Asturies 1998
(4)(8) La muerte y otros mundos. Maria Cátedra. Ed. Jucar
(6) Los vaqueiros de alzada. Juan Uria Riu. BPA 1976

José Angel Llaneza

Fotos archivo idiofonos@spolo.jazztel.es Boda Vaqueira 1978

septiembre 2003