L'Asociación de Folclore Tradicional
La Quintana echó a andar nel añu 1983, lo que fai que nesti
añu 2003, festexemos que venti años, a pesar de lo que diz el
cantar, si son algo.
La Quintana aconceyó a persones que teníen y tienen l'enfotu
de trabayar na investigación y l'espardimientu de la cultura tradicional
astur.
El motivu de poner el nome de La Quintana a l'asociación yera'l del
reconocimientu y el facer alcordanza d'un grupu de persones nel estudiu del
folclore qu'embaxo esti mesmu nome atropáronse, a lo cabero del sieglu
19, pa defender y afalagar la identidá de la cultura y patrimoniu asturianu.
Ente ellos figuraben el xixonés Xulio Somoza, Braulio Vigón,
Fermín Canella, Máximo Fuertes Acevedo o Rogelio Jove.
Dende 1983 les actividaes que desendolca
l'asociación son mui diverses y siempre estructuraes embaxo d'unos
criterios de recopilación de conocimientos y estudios, que se muestren
depués n'esposiciones, charles, conciertos didácticos, talleres,
publicaciones, alcuentros de músicos, etc...
La llingua asturiana foi dende l'aniciu la forma d'espresión utilizada
nel trabayu diariu de l'asociación y el mediu de comunicación
nes actividaes, sabiendo del peligru que cuerre de desapaecer, al igual qu'otres
estayes de la nuesa cultura.
La estaya musical fue'l centru d'atención y de mayor trabayu dende
l'entamu l'asociación y col tiempu, y gracies al gabitu que mos echaron
munchos collaboradores, tantu de forma colectiva como individual, consiguióse
nun solo alitar dalgunos instrumentos, sinón facer que muncha xente
sepa de la so esistencia. Asina como algamar una colección d'ellos
mui curiosa.
El material atropáu, y los conocimientos, punxéronse al serviciu
de munches persones venceyaes cola cultura asturiana, y tamién fuera
d'ella, interesaos na construcción d'instrumentos, na indumentaria,
a cabezaleros alministrativos de cultura, a dibuxantes, etc..., pero sobre
tou camentamos que tolo recoyío podía y debía valir de
sofitu nel ámbitu educativu, pa lo que s'entamaron actividaes empobinaes
a centros escolares y culturales. Programes educativos onde s'amuesa a les
neñes y neños la bayura cultural asturiana nos instrumentos
usaos de forma tradicional, nos fatos, nel afalague del usu de deportes y
xuegos tradicionales, nel estudiu de la mitoloxía astur, o deprender
a facer un instrumentu musical cenciellu.
ESCUELA DE MÚSICA
Ún de los proyeutos colos
que siempre se quixeren comprometer los miembros de l'asociación
yera'l de crear un centru de folclore y música tradicional.
Pasó tiempu, pero nel mes de setiembre de 1998 presentóse
en Xixón la Escuela de Música Tradicional La Quintana, qu'atropa,
per primer vegada dende hai 6 cursos, la mayor ufierta d'enseñances
del patrimoniu musical asturianu. Gracies a un alcuerdu col equipu directivu
del Colexu Públicu Rey Pelayo, de Xixón, onde de forma estraescolar
impartimos les clases. Asina la xente interesao pue escoyer ente asignatures
como: Asturianada, curdión diatónica, gaita, vigulín
tambor, zanfona, bandurria, guitarra, folclore, llinguaxe musical, baille,
percusión, y esti añu amestamos la posibilidá de deprender
a tocar l'harpa céltica. Como en toles asociaciones hubo momentos
de más trabayu y de menos, dependiendo de les persones que pasaren
per ella, anque siempre se mantuvo un llabor continuao.
