El sonido popular
Hai unos años alcontréme cola presencia d'una harpa vieya
n'Asturies y púnxeme entós a facer un trabayín sobre
esti instrumentu. El casu ye qu'entamé a recoyer información
sobre l'harpa y resultó que la bayura y la cantidá de datos
atropaos empobináronme a tresnar un llibru que nun tardará
munchu en salir al mercáu.
Esti artículu ye un retayu d'esi llabor onde s'amplía muncha
documentación de la equí presentada y qu'amuesa la hestoria
del instrumentu y los datos que se conserven n'Asturies del so usu.
La presencia n'Asturies d'un instrumentu musical comu l'harpa ye un fechu
que tá casi ensín investigar.
HARPA
Y LA SO PRESENCIA N'ASTURIES
Daniel García de la Cuesta
29 de payares del 2003
Nesti trabayu apúrrense una riestra datos atropaos col
enfotu d'afalagar a más persones a afondar nel estudiu d'esti tema
y alitar l'usu del instrumentu. Datos qu'a vegaes empobinaránmos nun
solo a la hestoria del instrumentu sinón que van facemos albidrar otros
asuntos enartiaos al so usu, etimoloxía, simboloxía, etc.
De mano faremos un averamientu a la etimoloxía y l'orixen hestóricu
de l'harpa. Puede estrañar ver la palabra harpa escrita con H pero
la documentación etimolóxica llévamos a alitar esta grafía
que desanició o desdexóse n'algunes llingues, magar comu veremos
esta lletra tien importancia abondo pal so estudiu.
Ello ye que la palabra aporta a nos dende'l vocablu Xermánicu (1)harfe
y el Griegu arpa
Nesti casu, en Griego, el vocablu harpa llevaba enriba la vocal d'aniciu la
grafía del nomáu espíritu ásperu "c"
lo que siñalaba la so pronunciación aspirada. Asocede lo mesmo
col vocablu harmonía,
Nel LLatín y n'otres llingues modernes conservóse la grafía H pa representar esi soníu y entá se caltién nel Alemán: harfe; nel Francés: harpe; Inglés: harp; y nel Portugués y Catalá: harpa.(3)Por embargu, el Castellán o l'Italianu desdexaron esta grafía.
Y havíe sinfonías, farpa, giga e rota.
Otru testu ye'l del poema d'Alfonso onceno escritu pa festexar el casoriu del rei, nel añu 1328, nel monesteriu de las Huelgas, en Burgos, diz asina:
Otros estromentos mill con la farpa de Don Tristan.
Curt Sachs (4)fala d'otru retayu del poema coles mesmes referencies:
La farpa de Don Tristan que da los puntos doblados.
A la metada del sieglu 15 Iñigo López Mendoza escribe:
e la farpa sonorosa que tal retinto tenía.
Mostrose la farpa que Orfeo tañía.
Otru autor del mesmu sieglu Gomez Manrique, diz nun cantar:
Euridice sentiría con la farpa sonorosa.
Hai que decatase del usu del artículu femenín "la" harpa.
REPRESENTACIONES N'ASTURIES
N'Asturies lo que pudiere ser la primera representación d'un instrumentu
d'esta triba tenémosla na ilesia románica del sieglu 12 de Santiago
Arllós, nel conceyu de LLanera. Ellí, nuna figurina, vemos la
representación d'una cabra tocando el nomáu harpa-salteriu o
rota-psalteriu.(5)
Nesta figura vese perbien que l'instrumentu tien dos órdenes o fileres
de cuerdes, una a cada llau.
Otra posible representación d'harpa n'Asturies pudo tar nes figures
qu'ornien por fuera la ilesia románica, del sieglu 12, de San Salvador
de Fuentes, na antigua Puebla de Maliayo.
Algunos autores señalen nestes figures a seres antropomórficos
que toquen la vigüela,(6)
pero nuna de les visites a la ilesia persones que viven nel entornu comentáronme
que la figura yera la d'un burru tocando l'harpa pero que cuando la guerra
civil de 1937 pegáron-y un tiru y quedó comu la vemos agora.
Na ilesia de San Xuan d'Amandi, en Villaviciosa, que ye del sieglu 13, parez
qu'hai una figura qu'aguanta por una harpa, decachordum o psalterium. Esti
instrumentu tien les mesmes característiques de los que pueden vese
enes figures de dellos manuscritos dende'l sieglu sestu al trece.
Un instrumentu puntiáu, que pudiere ser un salteriu, apaez nuna figura
d'un capitel nel llau oeste del claustru la Catedral d'Uviéu. Ye de
la segunda metada del sieglu 14.
De la mesma dómina, nel mesmu llau oeste del claustru y acompañando
a unos danzantes, atópase una figura que trai ente les manes un salteriu
trapezoidal.(7)
A dellos metros más a la so drecha vemos una figura, que probablemente seya de les mesmes feches que l'anterior, d'un caballeru que mantién al so lláu, nel suelu, otra harpa de tamañu medianu que-y llega hasta'l cadril. Conserva restos de pintura. Esta representación ye asemeyá a otra que puede vese nuna escultura de maera policromá, anónima y del añu 1500, que tá nel retablu central de la ilesia parroquial de Gumiel de Izán, en Burgos.
Años más lluéu, en 1450, faise'l pórticu la capiella del rei Castu onde vemos de nueves una figura d'un rei David tocando harpa.
Otra iconografía del instrumentu con relación asturiana ye la que se ve nun cuadru de Juan Carreño de Miranda que fizo pa los Trinitarios de Iruñea. Tá firmáu en 1666.(9)
Na ilesia del Carbayu, en Ciañu, LLangréu, que ye del sieglu dieciochu, vemos de nueves, pintáu nel techu la sacristía, la figura del rei Daviz tocando harpa.
Del añu 1749 yera un de los órganos qu'había na catedral d'Uviéu. Estos órganos pueden vese nunos grabaos de F. J. Parcerisa. Na cumal del órganu más grande, allugáu al llau de la epístola, había una figura d'un rei David tocando harpa.
En cuantu a les testos que mos apurren datos d'harpistes n'Asturies
tenemos que referimos a los documentos del archivu capitular de la Catedral.
Ello ye que dende l'añu 1572 al 1933 hai datos de la esistencia
de músicos.
Entre los años 1654 y 1734, 80 años, tuvieren relación
cola orquesta la Catedral dieciochu harpistes arriendes d'otros que non
figuren pero que se mencionen por intromisión y barrunto qu'habría
un númberu mayor polos acólitos, que yeren les persones
que deprendíen a tocar un instrumentu, y otros harpistes que se
contrataben n'ocasiones concretes.
Estos datos danmos una idega de la importancia y conocimientu qu'había
del instrumentu n'eses dómines n'Asturies.
Polos apellíos tamíen podemos conocer l'orixen de dellos
d'estos dieciochu harpistes. Hai dellos con apellíu de topónimos
asturianos comu Langreo, Noreña o Salinas.
Nun queda mui claro cómo yera l'asuntu de deprender a tocar un
instrumentu. Si se sabe que cuando un neñu del coru camudaba la
voz solía ponese a deprender a tocar algún instrumentu pero
nun sabemos como.
Hai que decir que los músicos de la Catedral tamién
salíen a tocar a otros pueblos d'Asturies a festividaes relixoses y
profanes, comedies y otros eventos.
El desaniciu de les noticies d'harpa na catedral coincide cola aparición
de los dos órganos que s'estrenaron en 1749 y 1751. (10)
Ya en 1732 propúsose que nun yera necesaria l'harpa y que podíen
aforrase los 300 riales que daben al contraltu por tocala,(11)
anque puede barruntase que si la orquesta tuvo embaxu la dirección
del maestru Enrique Manuel Villaverde, que componía p'harpa y dexó
la orquesta en 1776 y depués tuviere empobinada pol mayestru Joaquín
Lázaro dende 1781 a 1786, que tamién utilizó l'harpa
según aparez nes partitures,(12)
ye posible qu'hubiere alguna otra aparición n'esos 50 años.
Nel papel manuscritu del archivu capitular n'Uviéu
alcontramos entre una riestra partitures referencies ñidies relacionaes
cola interpretación de música a l'harpa. Darréu ufiertamos
un llistau entresacáu de los llibros de Raul Arias y Emilio Casares
(13)
onde s'apurren los datos que pertenecen a la información orixinal de
les partitures sueltes conservaes, onde se pueden ver títulos, formatu,
cantidá de fueyes, instrumentos a utilizar, etc..., todo ordenao sigún
l'inventariu:
Del cartafueyu 1. Anónimos:
2- Beatus Dídacus. Himnu a 8 vo, TiTiAT-TiaTB, con vls., ob., trompes,
harpa y bc.
L'orixinal diz: "Motete". 12 fueyes. Apaisao. 30,3 x 21,7 cms.
Del cartafueyu 3 (A). Anónimos:
11- LLeguemos reverentes. Recitao y aria pa tenor con vls., violón
y harpa.
(Particheles). 12 fueyes. Apaisao. 31,5 x 21,5 cms.
12- O poder, o bondad. Recitao y aria p'altu con vls., ob., trompes y harpa.
(Particheles). 15 fueyes. Apaisao. 31,5 x 21,5 cms.
Del cartafueyu 3 (B). Anónimos:
13- Oprimido de pena. Recitao y aria pa tenor con vls., harpa y violón.
(Particheles).
7 pliegos = 15 fueyes. 31,5 x 21,5 cms.
14- Hoy con sacro esplendor. Recitao y aria pa tenor con vls., trompes, harpa
y bc.
(Particheles). 16 fueyes. 31 x 21,5 cms.
Del cartafueyu 4 (B). Anónimos:
29- Villancico de pastorela con vls., trompes, violón y org. (falten
les voces). Hai les
siguientes particheles: Baxu de segundu coru, violón, oboe 1 y 2, trompa
1 y 2, harpa
y muérganu. 11 fueyes. Apaisao. 31 x 22 cms.
Del cartafueyu 12. Lázaro, Joaquín.
Mayestru Capiella en 1781.
24- Panis Angelicus. Motete a 8 v, TiTiAT-TiaTB, con vls., ob., trompes y
violón y
harpa. 7 fueyes. Apaisao. 31,3 x 22 cms.
Del cartafueyu 14 (A). Lázaro, Joaquín.
5- Estribillu a 8 v., con vls, trompes y org. obligao, (falten les voces).
Nun apaez otru
títulu. Hai una partichela d'harpa, arriendes de les mencionaes. 25
fueyes. Apaisao.
31,2 x 22 cms.
Del cartafueyu 14 (C). Lázaro, Joaquín.
20- Si ha de Haber. Villancicu de tonadillaa 8 v., TiATB- TiATB, con vls., trompes, ob., y org. obligao y harpa. (Particheles). La partitura diz: "Villancicu y tonadilla a 4 y 8 v.,.. Al Smu....y a Ntra. Sra.". 18 fueyes. Apaisao. 31 x 22,5 cms. (voces). +14 fueyes. Apaisao. 31 x 21,5 cms. (Instrumentos).
Estes son les partitures que mencionen la utilización d'harpa. Hai que decatase que munches partitures nun tán enteres y falta información n'elles pero puede albidrase que ya que l'usu de l'harpa taba destináu sobre tou a facer, xuntu col órganu, el continu y que, aunque nun figuren ñidiamente les indicaciones nes partitures, podía y debía interpretase harpa enes melodíes tantu de les partitures conservaes con indicaciones como n'otros temes.
NOTAS
1- Denómase Xermánicu a la llingua indoeuropea que s'espardió poles rexones nórdiques.
2- ESPASA-CALPE, voz armonía.
3- ANDRÉS, RAMÓN, Diccionario
de instrumentos musicales desde Píndaro a J. S. Bach, voz arpa, páxina
13 y Espasa-Calpe, voz harpa.
4-SACHS, CURT, The history of
musical instruments, páxina 264.
5 - Sobre la rota-psalteriu hai
un trabayu mui interesante de Christian Rault nel llibru Instrumentos de corda
medievais, investigación y reconstrucción, onde s'amuesa un
estudiu sobre la so etimoloxía y comparanza entre delles figures qu'esisten
per casi toa Europa en capiteles y manuscritos.
6- ÁLVAREZ MARTÍNEZ,
M ª SOLEDAD, Liño, páxina 666.
7- Datos consultaos nel llibru Instrumentos
musicales nel arte asturianu hasta 1800, de Florentina Cuadriello. Esti llibru
ye un trabayu imprescindible pa conocer tola iconografía musical relacionada
col arte asturianu.
8- DE CASO, FRANCISCO y otros autores,
la Catedral de Oviedo, segundu tomu, páxina 163 y DE CASO, FRANCISCO,
Temas mitológicos en el gótico astur, Entemu, páxina
184.
9- La Nueva España, El arte
en Asturias a traves de sus obras, páxina 760.
10 - CASARES RODICIO, EMILIO, La música
en el Barroco, páxina 195.
Estos muérganos fízolos el construtor Pedro de Liborna según
diz GARCÍA ALCALDE, GUILLERMO, nel so artículu La tradición
musical ovetense, na páxina 335 del Libro de Oviedo.
11 - CASARES RODICIO, EMILIO, La música
en la Catedral de Oviedo, páxina 112.
12 - ARIAS DEL VALLE, RAUL, La Orquesta
de la S. I. Catedral de Oviedo, 1572-1933, páxina 177.
13 - ARIAS DEL VALLE, RAUL, El papel
manuscrito del archivo capitular de Oviedo, y CASARES RODICIO, EMILIO, La
música en la Catedral de Oviedo.
