Gaita asturiana. Gabinete de estudios etnograficos

LLA GAITA ASTURIANA

Nun tá ñidio dende cuando se conoz la gaita n’Asturies, lo que si paez ye que los primeros datos alcuéntrense nun capitel de la ilesia románica de Santa María de La Oliva, en Villaviciosa, que ye del sieglu 13. Nella apaez una figura que tien un fuelle delantre del pechu y toca sobre un tubu que sal del fuelle.
Del sieglu 14, hai un capitel nel ala oeste del Claustru la Catedral d’Uviéu nel que paez qu’hai una figura d’un gaiteru con pates de LLeón. De lo cabero del mesmu sieglu ye una de les representaciones más conocíes qu’apaez nel “Libro de la Regla Colorada”, y ye la d’un coneyu gaiteru.
Nun necesitamos salir de la Catedral p’atropar más información, agora na sillería, tantu na del coru, como na de la Sala Capitular, que tá fechada del sieglu 15. La mayoría les representaciones presenten animales faciendo les veces de gaiteros, repitiéndose en delles la figura del gochu. Tamién apaecen un monu y un caballu gaiteros y na sillería del coru, una figura d'home.
Nel tarrén iconográficu la representación de la gaita ye rala hasta’l sieglu 19, anque dellos escritos de diferentes archivos apunten a la so presencia neses dómines sobre tou en fiestes civiles y relixoses. A esti fin Eugenio Martínez Zamora, nel so trabayu “Instrumentos musicales en la tradición asturiana” fai un estudiu mui axustáu d’esti tema, polo que ye recomendable la so llectura.
Ya nel sieglu 19, tenemos noticies abondo sobre la importante presencia de gaiteros, al traviés de cantares, poemes y pintures, que mos dan una bona idega del instrumentu emplegáu, asina podemos citar el realismu de los cuadros de Manuel Medina, o d'Álvarez Catalá.

Tipoloxía

La gaita asturiana encuádrase dientro de les gaites del tipu Atlánticu, al igual que toles del noroeste peninsular coles que comparte munches de les sos carauterístiques: roncón p’arriba y punteru cónicu.

El fuelle

Lo más carauterístico, como en toles gaites utriculares o de fuelle, ye la bolsa qu’almacena l’aire, lo que permite mantener un soníu continu ensin gran esfuerzu del músicu.
El fuelle fabrícase a partir d’una pelleya enteriza de cabritu. Esta pelleya trátase con productos pa curtila, que varíen según l’artesanu, de manera que quede suavín al empar que pierde’l pelu. Na bolsa que queda hai una serie de furacos, que correspuenden coles pates y el pescuezu l’animal, qu’a vegaes suelen aprovechase pa colocar unes pieces de maera, los asientos, nes que s’encaxen los diferentes tubos. Los furacos que queden añúdense y pónse-yos una piecina de maera nomá botón, que val pa impidir que l’aire fuxa per ellos. Xeneralmente’l fuelle nun se ve porque va recubiertu por un pañu: el vestíu, pol qu’asomen los asientos.
El fuelle convién tratalu de xemes en cuandu con grasa pa que conserve les propiedaes y allargar asina la so vida.

Los asientos

Son unos tubos tronco-cónicos que vense pela parte de fuera y que tán enxertaos nel fuelle, bien amarraos, pa torgar qu’escape aire pela xuntura.
La parte de dientro ye cilíndrica y permite l’encaxe de los diferentes tubos, encaxe que tien de ser herméticu pa torgar cualaquier perda d’aire. Pa conseguir un bon encaxe úsase filu alredor del espigu que debe entrar nellos, colo que l’axuste tien de ser perfeutu.
L’afuracamientu de los tubos ye pasante, anque nel casu del asientu nel que s’encaxa’l soplete lleva una pieza, el saliveru, pa retener la saliva y asina torgar que l’humedá que sal del soplíu entre toa nel fuelle.

Los tubos

Hai dos tipos de tubos qu’encaxen nos asientos. Un ye pa meter l’aire, el soplete, y otros dos pa producir soníos: el punteru y el roncón.

El soplete

L’aire dientro del fuelle métese col soplíu del gaiteru. Esti soplu faise nun tubu que per dientru ye cilíndricu y que va encaxáu nún de los asientos. Nel estremu del soplete qu'entra nel asientu ponse una válvula o llingüeta, que torga que l’aire que se mete nel fuelle vuelva salir pel mesmu sitiu. El mecanismu tradicional faise con un cachín de cueru y una lámina de cobre que s’ata con filu. L’aire al intentar salir presiona la llingüeta escontra’l tubu tapándolu.
El soplete suel tar mui torniáu, al gustu y modo de cada artesanu hasta tal puntu qu’a vegaes val como marca del artesanu, menos nel estremu que va a la boca, lo que se conoz como boquiella, pa permitir l’apoyu los llabios del músicu, anque nun ye raro que lleve amestáu un trozu de metal o güesu.

El punteru

El punteru ye la pieza cola que se fain les melodíes, pa ello lleva una riestra furacos qu'al tapar y destapar producen les diferentes notes.
El tubu per dientru ye cónicu y concide cola forma de per fuera, anque nel estremu más abiertu, pela parte de fuera ye acampanáu y per dientru non. Detalle curiosu a la hora del so estudiu.
Na parte d’arriba tien un espigu pa encaxalu nel asientu; nel espigu va colocadina una llingüeta doble que nomamos payuela. La payuela vibra col aire que vien del fuelle, y asina produz un soníu que depués va camudando al tapar y destapar colos deos los furacos qu’hai a lo llargo del punteru. El punteru lleva siete furacos per delantre y un per detrás. Más abaxu d’estos y enantes d'empezar a acampanase, el punteru tien otres dos buraques, les oreyes o troneres, qu’afeuten al timbre.

Según seya’l llargu los punteros faise una esbilla ente les gaites porque camuda’l so tonu. Tradicionalmente estrémense tres tipos de gaites:

La reonda, que suel tener un punteru de 32 cms. y que tá afinada en do.
La tumbal, más llarga y soníu más grave, xeneralmente afinada en si bemol.
La grillera, de menor tamañu y soníu más agudu, xeneralmente llega al re.

La payuela

Trátase d’una llingüeta doble, que necesita pa la so fabricación un cachín de caña mui finu dobláu pel mediu (pales), que s’endolca con filo alredor d’un tubín metálicu cilíndricu (ferrete).
Cola mesma caña faise un mecanismu (frenillu), que val pa mantener la presión de les pales y dai altor al soníu básicu que sal de la vibración de les pales. Pa rematar la payuela necesítase endolcar filo pa xunir toles pieces, les pales, el ferrete y el frenillu.

El Roncón

La pieza que produz la nota continua de la gaita, conozse col nome de roncón. Divídese en tres partes:

La prima, que tá cau del asientu. La copa, que ye la pieza que tá a lo cabero del roncón y la tercia, que como diz el so nome. tá ente la prima y el roncón. O seya que tercia entre estes dos pieces. Curiosamente, recoyimos una midida de llonxitú que se llama tercia y quiciavis pudiere corresponder cola midida d’esti tipu de pieces na antigüedá.
La forma del roncón ye cilíndrica per dientru, anque los tres tubos nun tienen la mesma sección, la parte de fuera tá torniada en tramos, tamién cilíndricos, menos el final de la copa que s’abre en cono invertíu, forma que tamién adopta per dientru pa dai sonoridá a los graves del instrumentu.

La xuntura ente los tres tubos faise dexando un espaciu con espigos, y que valen p’afinar l’instrumentu subiendo o baxando más o menos les pieces dientru los encaxes de los espigos.

El payón

Nel espigu de la prima, la pieza qu’entra nel asientu, ponse una llingüeta cenciella, tradicionalmente de caña y nomáu payón.
El payón al vibrar col aire que vien dende‘l fuelle, fai un soníu qu’amplifica’l propiu roncón.

Usos

De forma tradicional la gaita tócase en parexa, xunto col tambor. Nesti tipu de formación les interpretaciones más usuales son les de les alboraes y los pasucais, nes que’l gaiteru amuesa les sos habilidaes y téunica, y el tambor acompaña remarcando les diferentes partes de les melodíes, bien con golpes nel aru, bien con diferentes redobles.
Ye esti tipu de formación el que conocemos p’acompañar al baille. Equí tien muncha emportancia lo que faiga’l tambor, que marca’l ritmu al tiempu que remarca con diferentes toques los cambios enes melodíes, y asina echa un gabitu a los que baillen pa saber cuando cambia’l pasu.
Otru usu tradicional ye’l del acompañamientu de la asturianada, forma de cantar tradicional d’Asturies, nel que les melodíes son cencielles, pero mui orniaes, y onde’l gaiteru tien de facer un fondu siguiendo la voz del que canta tocando ornamentos con notines mui rápides, cachinos de melodíes, trinos, etc..., lo que se conoz como floreos y que se toquen en dellos momentos pa que descanse y respire'l cantante, úsase tamién esta téunica p’acompañar a los que baillen.
En delles zones ye un vezu l’usu de la gaita nes mises, xeneralmente ensin acompañamientu de tambo.

Daniel G. de la Cuesta | J. Angel LLaneza